ನನ್ನ ಶಕ್ತಿ ಮೀರಿ ನಟನೆ : ಕೌಸ್ತುಭ ಮಣಿ ವಿಶ್ವಾಸ
ಕಿರುತೆರೆ ಲೋಕದಲ್ಲಿ ಅಪಾರ ಅಭಿಮಾನಿ ಬಳಗ ಹೊಂದಿರುವ ಪ್ರತಿಭಾನ್ವಿತ ನಟಿ ಕೌಸ್ತುಭ ಮಣಿ ಅವರು ಹ್ಯಾಟ್ರಿಕ್ ಹೀರೋ ಶಿವರಾಜ್ ಕುಮಾರ್, ಇಂಡಿಯನ್ ರಿಯಲ್ ಸ್ಟಾರ್ ಉಪೇಂದ್ರ ಮತ್ತು ನಟ ರಾಜ್ ಬಿ ಶೆಟ್ಟಿ ನಟನೆಯ “45” ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಈ ಮೂಲಕ ಹಿರಿತೆರೆಯಲ್ಲಿಯೂ ಮೋಡಿ ಮಾಡಲು ಮುಂದಾಗಿದ್ದಾರೆ.
ಸದಭಿರುಚಿ ಚಿತ್ರಗಳ ನಿರ್ಮಾಪಕರೆಂದೇ ಚಿತ್ರರಂಗದಲ್ಲಿ ಖ್ಯಾತಿ ಪಡೆದಿರುವ ರಮೇಶ್ ರೆಡ್ಡಿ ನಿರ್ಮಾಣದ 45 ಚಿತ್ರವನ್ನು ನಿರ್ಮಾಣ ಮಾಡುತ್ತಿದ್ದು ಸಂಗೀತ ಮಾಂತ್ರಿಕ ನಿರ್ದೇಶಕ ಅರ್ಜುನ್ ಜನ್ಯ ಚೊಚ್ಚಲ ಬಾರಿಗೆ ನಿರ್ದೇಶನ ಮಾಡುತ್ತಿರುವುದು ವಿಶೇಷ.
“ನನ್ನರಸಿ ರಾಧೆ ” ಧಾರಾವಾಹಿ ಮೂಲಕ ನಾಡಿನ ಮನೆ ಮಾತಾದ ಪ್ರತಿಭಾನ್ವಿತ ನಟಿ ಕೌಸ್ತುಭ ಮಣಿ. ” 45″ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಈ ಕುರಿತು ಕೌಸ್ತುಭ ಮಣಿ ಮಾಹಿತಿ ಹಂಚಿಕೊಂಡಿದ್ದಾರೆ.
• ಚಿತ್ರಕ್ಕೆ ಆಯ್ಕೆಯಾದ ಬಗೆ ಹೇಗೆ?
ಹೊಸ ಚಿತ್ರದಲ್ಲಿ ಅವಕಾಶವಿದೆ ಎಂದು ಗೊತ್ತಾಯಿತು. ಆಡಿಷನ್ ಕೊಟ್ಟಿದ್ದೆ. ಚಿತ್ರಕ್ಕೆ ಆಯ್ಕೆಯಾಗಿದ್ದೇನೆ. ಇದೀಗ ಚಿತ್ರದಲ್ಲಿ ನಟಿಸಲು ಎದುರು ನೋಡುತ್ತಿದ್ದೇನೆ.
• ಶಿವಣ್ಣ-ಉಪೇಂದ್ರ ಅವರ ಚಿತ್ರದಲ್ಲಿ ನಟಿಸುತ್ತಿದ್ದೇನೆ ಎಂದಾಗ ಹೇಗನಿಸಿತು?
ಚಿತ್ರಕ್ಕೆ ಆಯ್ಕೆಯಾಗಿದ್ದೇನೆ ಎಂದಾಗ ಮೊದಲ ನಂಬಲು ಆಗಲಿಲ್ಲ. ಘಟಾನುಘಟಿಗಳ ಜೊತೆ ನಟಿಸುವುದು ಒಂದೆಡೆ ಖುಷಿ ಆದರೆ ಮತ್ತೊಂದು ಭಯ, ನಡುಕ ಕೂಡ ಇದೆ. ಶಿವಣ್ಣ ,ಉಪೇಂದ್ರ ಸರ್ ಅವರ ಜೊತೆ ಸಿನಿಮಾದಲ್ಲಿ ನಟಿಸುವ ಅವಕಾಶ ಸಿಕ್ಕಿರುವುದು ನನ್ನ ಭಾಗ್ಯ. ಕಲಿಯಲು ಉತ್ತಮ ವೇದಿಕೆ. ಸಿಕ್ಕ ಅವಕಾಶವನ್ನು ಸದುಪಯೋಗಪಡಿಸಿಕೊಳ್ಳುವ ವಿಶ್ವಾಸ ಅವರದು.
• ನಿಮ್ಮ ಪಾತ್ರ ಏನು? ಯಾರ ಜೊತೆ ನಿಮ್ಮ ಜೋಡಿ
ಚಿತ್ರದಲ್ಲಿ ನನ್ನದು ಬಬ್ಲಿ ಪಾತ್ರ. ರಾಜ್ ಬಿ ಶೆಟ್ಟಿ ಅವರಿಗೆ ನಾಯಕಿ. ಸದಭಿಚಿಯ ನಿರ್ಮಾಪಕರೆಂದೇ ಹೆಸರಾಗಿರುವ ರಮೇಶ್ ರೆಡ್ಡಿ ಅವರಂತಹ ದೊಡ್ಡ ಬ್ಯಾನರ್ ನಲ್ಲಿ ಅವಕಾಶ ಸಿಕ್ಕಿರುವುದು ಮತ್ತಷ್ಟು ಖುಷಿಗೆ ಕಾರಣವಾಗಿದೆ.
• ಕಿರುತೆರೆಯಲ್ಲಿ ದೊಡ್ಡ ಅಭಿಮಾನಿ ಬಳಗ ಹೊಂದಿದ್ದೀರಿ, ಈಗ ಹಿರಿತೆರೆಗೆ ಬಂದಿದ್ದೀರಿ ನಿಮ್ಮ ನಿರೀಕ್ಷೆ ಏನು ಅಥವಾ ಎಷ್ಟು ಜವಾಬ್ದಾರಿ ಹೆಚ್ಚಿದೆ
ಕಿರಿತೆರೆಯಲ್ಲಿ ಪಡೆದ ಅಭಿಮಾನಿ ಬಳಗವನ್ನು ಹಿರಿ ತೆರೆಯಲ್ಲಿ ಮತ್ತಷ್ಟು ಹೆಚ್ಚಿಸಿಕೊಳ್ಳುವ ತವಕವಿದೆ. ಜೊತೆಗೆ ಸಿನಿಮಾ ರಂಗದಲ್ಲಿಯೂ ಕೂಡ ಅಭಿಮಾನಿಗಳನ್ನು ಸಂಪಾದಿಸುತ್ತಲೇ ಕಿರುತೆರೆಯ ಅಭಿಮಾನಿಗಳನ್ನು ಕಾಪಾಡಿಕೊಳ್ಳುವುದು ದೊಡ್ಡ ಜವಾಬ್ದಾರಿಯಾಗಿದೆ.
• ಯಾವ ತರದ ಪಾತ್ರ ಮಾಡುವ ಆಸೆ ಇದೆ?
ಹೊಸ ತನದ ಪಾತ್ರಗಳ ಮೂಲಕ ಗಮನ ಸೆಳೆಯುವ ಕನಸು ಇದೆ.ಯಾವುದೇ ರೀತಿಯ ಪಾತ್ರ ನೀಡಿದರೂ ಈ ಹುಡುಗಿ ಮಾಡಬಲ್ಲಳು ಎನ್ನುವ ಮೆಚ್ಚುಗೆ ಪಡೆಯುವ ಆಸೆ ಕೂಡ ಇದೆ. ಇಂತಹದುದೇ ಪಾತ್ರ ಅಂತ ಏನೂ ಇಲ್ಲ ಜನರ ಮನೆ ಮನಸ್ಸಿಗೆ ಹತ್ತಿರವಾಗುವ ಪಾತ್ರ ಮಾಡುವ ಕನಸಿದೆ. ಸಿಕ್ಕ ಪಾತ್ರಕ್ಕೆ ಶಕ್ತಿ ಮೀರಿ ನಟಿಸಿ ಎಲ್ಲರ ಪ್ರೀತಿ ವಿಶ್ವಾಸ ಪಡೆಯುವ ಹಂಬಲ ಮತ್ತು ಕನಸಿದೆ.
• ಸದ್ಯದಲ್ಲಿಯೇ ಚಿತ್ರೀಕರಣ
ಶಿವರಾಜ್ ಕುಮಾರ್ , ಉಪೇಂದ್ರ ಮತ್ತು ರಾಜ್ ಬಿ ಶೆಟ್ಟಿ ಕಾಂಬಿನೇಷನ್ ನಲ್ಲಿ ಮೂಡಿ ಬರುತ್ತಿರುವ ಚಿತ್ರವನ್ನು ಸದ್ಯದಲ್ಲಿಯೇ ಚಿತ್ರೀಕರಣ ಆರಂಭಿಸುವುದಾಗಿ ನಿರ್ಮಾಪಕ ರಮೇಶ್ ರೆಡ್ಡಿ ತಿಳಿಸಿದ್ದಾರೆ.
ಎಲ್ಲೆಲ್ಲಿ ಚಿತ್ರೀಕರಣ ಮಾಡಬೇಕು ಎನ್ನುವುದೂ ಸೇರಿದಂತೆ ಎಷ್ಟು ದಿನ ಚಿತ್ರೀಕರಣ ಮಾಡಬೇಕು ಎನ್ನುವ ಕುರಿತು ಒಂದೆರಡು ದಿನಗಳಲ್ಲಿ ಅಂತಿಮ ಮಾಡಿ ಚಿತ್ರೀಕರಣ ಮಾಡಲಾಗುತ್ತಿದೆ. ಕನ್ನಡ ಚಿತ್ರರಂಗಕ್ಕೆ ಸದಭಿರುಚಿಯ ಚಿತ್ರ ನೀಡುವ ಉದ್ದೇಶವಿದೆ ಎನ್ನುತ್ತಾರೆ ಅವರು.
ರಮೇಶ್ ಅರವಿಂದ್ ನಿರ್ದೇಶನ ಮಾಡಿ ನಾಯಕನಾಗಿ ನಟಿಸಿದ್ದ ಚಿತ್ರವನ್ನು ಹಿಂದಿಯಲ್ಲಿ ವೀನೀತ್ ಕುಮಾರ್ ಸಿಂಗ್ ಮತ್ತು ಊರ್ವಶಿ ರೌಟೇಲಾ ನಾಯಕಿಯಾಗಿ ಕಾಣಿಸಿಕೊಂಡಿರುವ “100” ಚಿತ್ರವನ್ನು ಒಟಿಟಿಯಲ್ಲಿ ಬಿಡುಗಡೆ ಮಾಡಲು ನಿರ್ಮಾಪಕ ರಮೇಶ್ ರೆಡ್ಡಿ ಅವರು ಸಿದ್ದತೆ ಮಾಡಿಕೊಂಡಿದ್ದಾರೆ. ಒಟಿಟಿಯಲ್ಲಿ ಬಿಡುಗಡೆ ಸಂಬಂದ ಮಾತುಕತೆ ನಡೆಯುತ್ತಿದೆ ಎಂದು ಖಚಿತ ಪಡಿಸಿದ್ದಾರೆ.
ಇನ್ನು ಕನ್ನಡದಲ್ಲಿ ಪ್ರಶಸ್ತಿ ಪಡೆದ ನಾತಿ ಚರಾಮಿ ಚಿತ್ರವನ್ನು ಮಲೆಯಾಳಂನಲ್ಲಿಯೂ ಕೂಡ ರಿಮೇಕ್ ಮಾಡಿದ್ದು ಆ ಚಿತ್ರವನ್ನು ಮುಂದಿನ ತಿಂಗಳು ಬಿಡುಗಡೆ ಮಾಡುವ ಉದ್ದೇಶ ಹೊಂದಿದ್ದಾರೆ ನಿರ್ಮಾಪಕರು
